E tocca..torraus a scriri...

E tocca!
Ayo' ca arrecumentzaus a scriri calincuna cosa...
1) No tengu gana 'e fia nudda, 'oi.
2) cras mi ndi depu partiri in Bologna po una coya
3) no mi nd'arregordu prus cumenti si scriint is cosas in sardu -custu no bandat beni    po nudda...
4) barias e eventualis...

Ah, su discursu deu presidenti Soru a pitz''e su sardu, in SARDU, m'e' pràxiu, e mada puru!
E a bos atrus?

Postu de: maistu a 13:50 | link | commenti (5)

Campionau sardu de sa murra

E ocannu puru nci seus!
Su 12 de Austu, in Orthullè (Urzulei) , nc'at essi su Campionau sardu de sa murra e s'Atoòbiu internatzionale de 'os murradores de su Mediterranau.

Una grandu festa con murradoris sardus e stranjus ki ant a ndi benni de Corsica, Friuli, Marche, Emilia Romagna! A s'acabu de su campionau: ballu sardu, cantu a tenore e launeddas de Paule Mallus!

Seis totus cumbidaus a benni, ca nc'at essi sa cena manna cun totus is amigus de sa murra!

A si biri kitzi in Orthullè!

Postu de: maistu a 13:23 | link | commenti (5)

Seu pren''e cosas de fai!

E no nci da fatzu a scriri nudda in custas diis! Depu pediri iscusa, ma sigumenti tengu unas cantus cosas de nai, mi bollu pigai un tempu longu po das scriri cumenti si depit!!!
Comuncas, sighei a mi ligi!
A s'intendi

Postu de: maistu a 10:23 | link | commenti

Pecau...

...'ta pecau.
festa sciuciada gratzias a una balossada de ZIdane.
Custa e' sa cosa ki m'e' spraxa de prus. E a una manera ki m'at postu una trisura manna; manna poita ca, ancora una borta, un'omini ki iat depi donai s'esempru a is pipius, e in generali, a totu su mundu, at peèrdiu s'ocasioni.
E biri a unu campioni de giogu cumenti a Zidane, acabai sa carrera de aici, no m'at fatu beni.
A s'intendi.

Postu de: maistu a 09:53 | link | commenti (2)

Cantu balit sa vida umana?

Custa e' sa pregunta ki donnyunu si depit fai sempri.
Specis candu sutzedint cosas a tipu cussa ki e' sutzèdia in Bidd'e Gresia (Iglesias): un'omini at bocìu unu pastori a fusili in su coili suu.

<<e poita?
>>poita ca su pastori iat donau un'abbussinada a su fillu, ca su pipiu d'iat kistionau mali.
<< e po custu su babbu de su pipiu d'at bocìu?
>>eya!

Su ki ais liju est una fuaeddada de fantasia intr''e duus personis calikisiant.
Depit essi, in evidèntzia, ki sa vida no balit prus nudda, poita ca ki bastat un'abbussinada a unu pipiu po bociri un'omini, calincuna cosa est andendi a trevessu.
Sa sloutzioni est una e una sceti: tocat a pigai torra (recuperare) su valori de sa vida.
E custu si podit fai sceti imparendi is pipius a piticus, imparendisi' s'arrespettu de sa vida, de sa natura, de is pegus.
S'arrespetu de sa vida.
Oindi' custus parint fueddus sentz'e sentidu, e custa cosa e' -po mei, e isperu aici po totus- traballosa meda de atzetai!

A s'intendi

Postu de: maistu a 07:49 | link | commenti (1)

Festa manna

Ari seru, a pustis de sa partida de s'Italia, m'apu pigau sa Vespa e mi ndi seu andau a giru in ArRoma po biri sa festa manna de is tifosus in is arrugas.
Unu grandu burdellu, ma mi seu spassiau meda a biri totu sa genti festendi in paxi, sentz''e fai dannus perunu -invecis in Pratz''e Jenne in Casteddu calincunu fill''e porca s'e' postu a sfoddai màkinas, e a gherrai contras a sa Politzia, bellu esempru de civilitadi.
Torrau a domu -ca depo durmiri a su mancu 7 oras po no tenni doloris stramus a menjanu- mi seu postu a pensai...
Deu no m'intèndiu diaderus italianu, poita ca no cumprèndiu  su sentidu de su fueddu "italianu" -in sentidu de personi-.
Pigau a contra-esempru, invecis, is americanus, frantzesus -e jai innoi podeus fai differèntzias, ca unu pariginu s'intendit pariginu, prus ca frantzesu- tedescus. In cussus logus sa genti s'intendit parti de una natzioni, istorigamenti e curturarmenti "omogenea" poita nasça e pasça cumenti natzioni intrea, cun d-unu pòpulu cun d-una identidadi pretzisa, uguali, po totus in tzitadinus.
In s'Italia no e' de aici.
Sa diferèntzia de curturas in is diferentis logus de s'Italia est a sa basi de is pratziduras sotzialis, ma rapresentat a s u matessi tempus s'arrikesa de s'Italia.
Ma s'Italia no e' sempri stètia "unia". S'Italia ndi benit da unu sciacumannu  de micro-statixeddus, postus paris a son''e cannonis de Vittorio Emanuele II de Savoia ('ta bellu acabu ki e' fendi sa dinastia Savoia....): a unu momentu siclianus, arromanus, toscanus e is atrus funt stètius fatus "italianus".
Custa cosa s'intendit 'oi puru, e in manera forti.
Po custu deu no m'intèndiu italianu: poita ca seu cumbintu ki no nci siat nisçunus ki in Italia si potzat nai "italianu".
Deu m'intèndiu unu sardu in Italia.
Su sardu e' diferenti de su milanesu, ou de s'artu-atesinu, ou de su piemontesu (cussus, a pustis...), e perou bivit in Italia e duncas cun s'Italia intrea si depit cunfrontai e depit arrexonai.
Deu no tengu in coru s' "amor di patria", poita ca sa terra mia e' sa Sardinnya, ma bivu cumenti sardu in Italia e in Europa, e duncas bivu a custa manera su miu "essi italianu".
Sardu Italianu Europeu.
...
Parit una arratz''e cani....

A s'intendi

Postu de: maistu a 08:49 | link | commenti (8)

sonnu

Cehh...seu tzakendimi' 'e su sonnu!
A pedronai (iat essi nau babbu miu), ma no tengu gana 'e scriri, cras' a menjanu, forsis...
A si biri!

Postu de: maistu a 22:11 | link | commenti

Arratz''e c..u, "mister Lippi"!

Biendi sa partida, ariseru meri', m'e' bènnia una tristura, ma un tristura manna. Po duas arrexonis:
1) sa partida no e' stètia bella, s'Italia no depiat binci -ma sigumenti ca a bortas s'Italia at pèrdiu candu no depiat perdi, a su mancu sa sorti  esti pratzia-
2) is cummentadoris no ant nau nudda a pitz''e sa ciaputzesa de Marcello Lippi, su "mister". Misiat misiat su mister.
Unu ki no e' bonu a ponni un'iskuadra in campu ki abarrit arricia, ma mi du scieis spricai ita nci fait a commissariu tècnigu?
...
mmmhhh...
E ki inbecis funt is jogadoris ki no scìint jogai?
(Arratz''e dudas perefundas ki mi benint, ugualis ugualis a is de Beethovan in cantu fiat cumponendi sa Sinfonia nr. 9....depit essi sa baska innoi in ArRoma)
Bah, imoi mi pongu a traballai.
A s'intendi.

Postu de: maistu a 07:27 | link | commenti (1)

Vespa noa? Vida noa!

A bortas bastat unu nudda po cumentzai beni sa cida, in su lunis menjanu.
E 'oi seu diaderus cuntentu, ca seu bènniu a traballai cun d-unu mèdiu nou:
sa Vespa PX 150, blu noti. (da podeis biri a suta)
Sigumenti ca no nci da faemu prus a pigai sa màkina po andai a s'ufìtziu, a s'acabu mi seu detzìdiu e m'apu comporau custu ki no est unu mèdiu po si movi, po si spostai de unu logu a s'atru, sa Vespa est una filosofia de vida.

Calincunu iat podi cumprendi in manera strama su ki seu narendi, ma seu cumbintu ki sa Vespa siat una manera de bivi sa vida. Bollu nai: is mèdius nous cumenti is "scooters" funt arroba po andai lestrus, po bivi su ritmu de sa tzitadi, fatu de prandis prontus - a bortas pre-cotus- de cursas de una parti a s'atra, de su tempus "ki no acabat mai" -a pustis mi du boleis narai ita depi sempri curri una personi? Bastat ki pregunteis a kinikisiat amigu, issu s'at a arrespundi sempri:
 "No tengu tempus de fai nudda, seu sempri currendi".

Nou

Deu apu detzìdiu de no curri, de pigai is cosa cun calma, abellu, e po custu bandu in Vespa. Po beni ki mi potzat andai, potzu arribai a fai 82Km/h, ma in tzitadi no bollu curri de prus, primu poita ca e' periculosu, e secundu poita ca ArRoma e' aici bella ca da bollu castiai beni, intendendi s'aria de is pinus acant''e su Circu Massimu, de is Tillyus in s'Aventinu, de is pinus de su quartieri Mostacciano, e de su mari, in cantu mi ndi andu a papai, a meri', in Fiumicino ou in Ostia.
In prus, cun d-unu prenu de benzina nci fatzu 300Km!

Scusaimi' si e' pagu.

A s'intendi

Postu de: maistu a 07:45 | link | commenti (3)

Acab'e cida cansosu? naahh!

Acab'e cida prenu de cosas de fai...Divanu, birra e partidas de su mundiali.
Balla, no tengu gana e' fai nudda -mancai s'immortalitadi de s'anima siat su primu de is pensamentus mius...
Mi seu pasendi, e intzandus?
A s'intendi

Postu de: maistu a 10:10 | link | commenti (6)